Солтүстік Қазақстанға жасаған сапарында ҚР Премьер-министрінің орынбасары Тамара Дүйсенова облыстың денсаулық сақтау саласымен танысып, жергілікті медициналық мекемелердің жұмысын бағалады. Жиында ҚР денсаулық сақтау вице-министрі Ержан Нұрлыбаев облыстағы денсаулық сақтау жүйесінің қазіргі жағдайы мен даму жоспарлары туралы айтты.
Облыс көлемінде 19 аурухана мен 59 амбулаториялық-емханалық ұйым бар, ал төсек-орын қоры 3 395 бірлікті құрайды.
Ауылдық денсаулық сақтауды жаңғырту мақсатында 2023-2024 жылдары 46 жаңа медициналық нысан салынады.
Медициналық сақтандыру қорының басқарма төрағасы Әбілқайыр Сқақов МӘМС жүйесінің тиімділігін атап өтіп, соңғы уақытта дәрігерлерге қатысты шағымдардың азайғанын мәлімдеді. Ол облыстағы медициналық мекемелермен тығыз байланыс орнатылғанын, қаржының уақытында бөлініп отырғанын және пациенттердің медициналық қызмет сапасына қанағаттануы артқанын айтты.
Сапар барысында Тамара Дүйсенова Пресновка ауылында жаңа медициналық мекеменің құрылысымен танысып, дәрігерлерге медициналық қызметті сапалы әрі тиімді ұйымдастыру, мемлекет бөлген қаражатты үнемді пайдалану туралы тапсырмалар берді.
